रुकुम पश्चिमको चौरजहारी नगरपालिकामा ब्लड बैंक सेवा उद्घाटन गरिएको छ । नेपाल रेडक्रस सोसाइटी चौरजहारी उपशाखाद्वारा चौरजहारी नगरपालिका र चौरजहारी अस्पतालको समन्वयमा ब्लड बैंक सेवा सञ्चालन गरिएको छ । चौरजहारी नगरपालिका १ नाखिरास्थित रेडक्रस भवनमा उक्त सेवा सञ्चालन भएको हो ।
एक औपचारिक कार्यक्रमका बिच चौरजहारी नगरपालिका प्रमुख पुष्प वादीले ब्लड बैंकको सेवा उद्घाटन गरे । ब्लड बैंक उद्घाटन गर्दै नगरप्रमुख वादीले रगतको अभावमा बिरामीको ज्यान जाने अवस्था आउन नदिन ब्लड बैंकको सेवा सञ्चालन हुनु खुशिको कुरा भएको बताए । लामो समयको प्रयासपछि सञ्चालन भएको उक्त सेवाको निरन्तरताको लागि स्थानीय सरकारको तर्फबाट सक्दो सहयोग गर्ने प्रतिबद्धता समेत उनले गरे ।
चौरजहारीमा ब्लड बैंक सञ्चालन भएसँगै जाजरकोट, सल्यान र रुकुम पश्चिमका बिरामीहरुको लागि रक्तसेवामा सहज हुने विश्वास लिईएको छ । ब्लड बैंक सञ्चालनमा बिभिन्न व्यक्तिहरुले समेत सहयोग गरेको रेडक्रस चौरजहारीका सभापति तेजबहादुर बटालाले जानकारी दिए ।
